Egitarau zabalaz gozatzeko aukera egon bazen ere, eguerdi aldera egindako aldarrikapen poteoa izan zen nagusi. Bertan, Euskal Herriko gazte eragile bakoitzak arlo ezberdinetan egiten duen lana goraipatu zelarik.
Aurreko zapatuan, hilaren 17an konkretuki, Udaberri jaia ospatu zen Otxandion gazteen eta tabernarien elkarlanari esker. Eguraldiak euritara joko zuela ematen bazuen ere, gazteek gogotsu ekin zioten egunari. Egun horretan, Donibane Lohitzunen, Jon Anzaren kasuaren inguruan egia eskatzeko manifestazioa antolatuta zegoela, eta bertara hurbildu ezin izango zirela jakinik, herritarrak puzzle erraldoi bat egitera animatu ziren. Anzaren aurpegia irudikatzen zuen 4×3 metroko puzzle erraldoia osatu eta geroan plaza erdian kokatu zuten elkartasuna adieraziz.
Puzzlea bukatu bezain laister, eguneko ekitaldi nagusiari hasiera eman zioten. Gazteria antolatu baten beharra azpimarratu zen aipatutako ekitaldi horretan, gazteak arlo ezberdinetan antolatzen direla erakutsiz. Hala nola, emakumeen arloan, hedabideen arloan, hezkuntzan, internazionalismoan, kulturan… Esandako guzti hori, bertso, kantu eta irudiei esker erakutsarazi zuten.
Erlojuan hirurak pasatxo zirela, Gaztetxera hurreratu ziren 50 bat gazte inguru bazkariaz, bertso saioaz eta Durangaldeko Gazte Asanbladen korto emanaldiaz gozatzera.
Arratsaldeko zazpiak inguruan Otxandioko bazterrak alaitu bazituen Akelarre txaranga Gasteiztarrak, gauez plaza bete zuten Emon eta Akerbeltz taldeek.
Egunak euritara joko zuela bazirudien ere, beste egun batez, gazteek, eguzkia ateratzea lortu zuten.
No hay comentarios:
Publicar un comentario